കൊല്ലണം അവരെ...

വാളയാർ കുരുതിയിൽ മനംനൊന്ത് കുറിച്ച വരികൾ

കൊല്ലണം അവരെ...

ആരെയും അറിയിക്കാതെ പഠനം തുടർന്നു,
വൈകിട്ടെത്തുന്ന മാമൻമാരുടെ
തൊടലും, പിടിക്കലും, മടിയിലിരുത്തലും

അച്ഛനും അമ്മയ്ക്കും നോട്ടുകൾ നീട്ടും
അതു വാങ്ങിയെടുത്തവർ കണ്ണുകൾ പൂട്ടും

പൊതികൾ തുറന്നവർ ഭക്ഷണം നിരത്തും
വിശപ്പിന്റെ മുന്നിലവർ പലതും കണ്ടില്ലെന്നു നടിക്കും

വീട് മദ്യം വിളമ്പും ശാലയായി മാറ്റും

ഇരുട്ടിന്റെ മറവിൽ ആ നരാധമന്മാർ
കരയിച്ച്, വാപൊത്തി, ഞെരിച്ചമർത്തും
പൊടുന്നനെ മിണ്ടാതെ യാത്രയാവും

ദൈവമില്ലാത്തോരു ദൈവത്തിൽ നാടിത്
കൊന്നവർ മാന്യരായ് വിലസുന്ന നാടിത്
സാധുവിനെ ചൂണ്ടും നിയമത്തിൻ നാടിത്

 നാളെ പുതുമ തേടി അവർ വീണ്ടും വരും
ഉള്ളതിൽ കിളുന്ത്‌ കുഞ്ഞുങ്ങളെ തേടി,
അതിന്റെ അറുതിക്കായ്
കൊല്ലുന്ന നിയമം വേണം
ഒരു കുഞ്ഞിനെ തോണ്ടുമ്പോൾ
ഒരു സ്ത്രീയെ പിടിക്കുമ്പോൾ
ആ കൈ വിറയ്ക്കണം.

വിസിലും ബോർഡും ഒരു ചായയും

'എന്തേ വിസിലൊന്നും കേൾക്കുന്നില്ല?
എവിടെ അവൻ ചത്തോ?
ചായ കുടിക്കുകയായിരുന്ന
ഞാൻ തലയുയർത്തി നോക്കി,
പുറത്ത് ഹോട്ടലിന്റെ മുൻപിൽ
പാകമല്ലാത്ത പട്ടാള യൂണിഫോം അണിയിച്ചു
കഴുത്തിൽ "HOTEL" എന്ന ബോർഡും തൂക്കി
ചുണ്ടിൽ ഒരു വിസിലുമായി ഒരു പടുവൃദ്ധൻ.
ഊതി, ഊതി ക്ഷീണിച്ചിട്ടാവും
ആ പാവം നിശബ്ദനായത്.

കലാലയമേ വിട

അവസാനം കലാലയ പടിവാതിലിൽ
നീ മറയുമ്പോൾ
ഒരു നോട്ടത്തിനായി ഞാൻ കാത്തിരുന്നു.
പക്ഷേ നീ.... നീ..... തിരിഞ്ഞുനോക്കാതെ
എൻ ചാരത്തെത്തി
നെഞ്ചിൽ കിടന്നു കത്തി പടർന്നു.....

ഓണാശംസ 2019

ആ പഴമയുടെ പൂക്കാലം
തിരികെ വരില്ലെങ്കിലും
അങ്ങിനെ ഒരു നാൾ വരും
എന്ന പ്രതീക്ഷയിൽ
മഹാബലി തമ്പുരാനായി
വിരുന്നൊരുക്കുന്ന
ഓരോ മലയാളിക്കും
ഏറ്റം ഹൃദ്യമായ
ഓണാശംസകൾ.

ചങ്ങല

ഇവിടെ ജീവിക്കാനറിയില്ല,
ചെയ്യുന്നതൊക്കെ തെറ്റ്,
പറയുന്നതൊക്കെ തെറ്റ്,
മുന്നോട്ടുള്ള വഴികൾ ശൂന്യം
ഇതുമനസ്സിലാക്കിയാവും
അവർ എന്നെ
ചങ്ങലയ്ക്ക് ഉള്ളിലാക്കിയത്.

മണ്ണ്

മണ്ണുതിന്നു വളർന്നെന്നെ
'മണ്ണ്'തിന്നുന്നതാണ് ജീവിതം

നിരാശ

'ആശ'യുടെ പുറകെ നടന്നിട്ട്
നിരാശ മാത്രം മിച്ചം

സ്വപ്നം

നാളെയുടെ യാഥാർഥ്യങ്ങളെ
ഇന്നിന്റെ ക്യാൻവാസിൽ
വരയ്ക്കുന്ന ചിത്രങ്ങൾ

ശിഥിലമാകുന്ന മാതൃത്വം

വാരിപുണരേണ്ട കൈകൾ
വരിഞ്ഞുമുറുക്കുന്ന കാലം.
കൊഞ്ചികളിക്കേണ്ട നാവുകൾ
അസഭ്യം പുലമ്പുന്ന കാലം
ഓമനിക്കേണ്ട ചുണ്ടുകൾ
കൊത്തിപ്പറിക്കുന്ന കാലം
അമ്മയെന്ന പുണ്യം
ഒരു സത്വമായ്‌ മാറുന്ന
കലികാല വൈഭവം

പ്രണയം

പരിണയിച്ചവളെ
പാടേ മറന്നിട്ട്
മനസ്സിൽ പരിഗ്രഹിച്ചവളുടെ
പുറകെ പോകുന്നതാണ്
ഇന്നിന്റെ പ്രണയം

നിയമം

കരിഞ്ഞു തീർന്ന മകളെ
നിന്നെ പച്ചയ്ക്ക് കത്തിച്ചവനെ
കൊല്ലാതെവിടാൻ
കഴിവുള്ള നിയമമുണ്ടിവിടെ

മാപ്പ്

എന്നും
കരുതും
ഇനി
പറയേണ്ടി വരില്ലെന്ന്
ദേ
പിന്നെയും..

മലയാളം

മലയാളം മാതൃഭാഷ,
കൂടാതെ ശ്രേഷ്ഠഭാഷ
ഇത് അംഗീകരിക്കാത്ത
വിദ്യാലയങ്ങളുള്ള
നാടാണ്  കേരളം

അതിജീവനം

അതിജീവനത്തിന്റെ താളുകൾ മറിച്ച്നോക്കി.

ആ പുസ്തകം എഴുതിയിരിക്കുന്നത്
തൂമ്പാ പോലുള്ള എന്തോ വസ്തു കൊണ്ടാണ്.

അതിന് ഒരു വശത്തേക്ക് മാത്രമേ പ്രവർത്തിക്കാനാകൂ.

നന്ദി

പണം കൊടുക്കേണ്ടടുത്ത്
പണം കൊടുക്കണം.
നന്ദി കൊടുക്കേണ്ടടുത്ത്
നന്ദി കൊടുക്കണം.

ഇന്നതെല്ലാം ഒരു താങ്ക്‌യൂവിൽ ഒതുക്കും

കാത്തിരിപ്പ്

ചുവപ്പുനാടക്കുരുക്കിലൂടെ
ഒരു പ്രവാസിയുടെ
എല്ലാം ശരിയാകാനുള്ള
കാത്തിരിപ്പിന് വിരാമമായി. 

മഴ

എന്നൊക്കെ ഞാൻ
കുടയെടുക്കാതെ പോയോ
അന്നൊക്കെ എന്നെ
കരുതിക്കൂട്ടി നനയിച്ചവൾ 

അടുപ്പം

അടുപ്പുകൾ പോലെ ഞങ്ങൾ അടുത്തിരുന്നു.
ഞങ്ങൾക്കിടയിലാരോ വിറകുകൾ
കൊണ്ടൊരകലം തീർത്തു.
മറ്റാരോ ആ വിറകിനു തീയിട്ടു
പിന്നേം ഞങ്ങൾ അടുത്തു.
അടുത്തതായി അടുപ്പം കൂടി
ഇതല്ലേ ജീവിതം. 

പ്രേയസി

മഴ നനഞ്ഞൊരെൻ കനവുകൾക്ക്
മിഴിവ് നൽകിയ സുന്ദരി,
നീ ചിതലരിച്ചൊരെൻ രചനകൾക്ക്
ജീവനായെന്റെ പ്രണയിനി.

ആൽത്തറ

ആൽത്തറയിൽ ഇരിക്കുവാൻ ആളില്ലാതായി.
ഓരോരുത്തരും മൊബൈലിൽ ഒരു ലോകം
പടുത്തിട്ട് ആ കൂട്ടിലായ്.
അവസാനം ആൽമരം ഒരു വഴികണ്ടെത്തി,
ആളെകൂട്ടുവാനായൊരു ഗൂഗിൾ ആപ്പ്,
"ആൽത്തറ ബുക്ക് ചെയ്യൂ
ശുദ്ധവായു ശ്വസിക്കൂ".

ഫാതേർസ് ഡേ മദേഴ്‌സ് ഡേ

അച്ഛനൊരു ഡേ.
അമ്മയ്ക്കൊരു ഡേ.
അവരുടെ അച്ഛനും അമ്മയും
അവരുടെ ഡേയ്ക്കായി
കാത്തുകിടക്കുന്നു.  

ഭാഷ

സ്കൂൾ ഉദ്‌ഘാടനത്തിനു വന്ന
പണ്ഡിറ്റ് ഗോപിമാഷ്
മലയാളി, മലയാളഭാഷ
ഒഴിവാക്കുന്നതിനെ വിമർശിച്ചു.
അക്കമിട്ടുപറഞ്ഞു ശ്വാസിച്ചു 
കേട്ടവർ കോരിത്തരിച്ചു. 
കൈയടികൾ കൊടുമ്പിരിക്കൊണ്ടു.

യാത്രയാക്കിയപ്പോ മകനെക്കുറിച്ചു
തിരക്കി,
അവനെ സി ബി എസ് ഈ യിൽ
വലിയ തുക കൊടുത്താണ് ചേർത്തതെന്നു
അഭിമാനത്തോടെ പറഞ്ഞിട്ട്
ഗോപിമാഷ് കാറിൽ പറന്നു. 

ദാരിദ്ര്യം

ദാരിദ്ര്യം 
അളക്കുന്ന
രീതി മാറി
ഇപ്പൊ നിറം 
നോക്കിയാ റേഷൻ.
വർണ്ണവിവേചനം
അവസാനിക്കുന്നില്ല.

പൊതിച്ചോർ

പൊതിച്ചോറുമായ് പണിക്കുപോകുന്ന ബംഗാളി.
അവനുണ്ടാക്കിയ പൊതിച്ചോർ വിലയ്ക്ക് വാങ്ങുന്ന മലയാളി.
ഊണ് കഴിഞ്ഞ് ഏമ്പക്കം വിട്ടിട്ട് ആ കറിയിലെ
മലയാളിരുചിയെ വാനോളം പുകഴ്ത്തി
ഇതുകേട്ട് ഗ്ലാസ്സെടുക്കാൻ വന്ന ബംഗാളി
ഒന്നമർത്തി ചിരിച്ചു.... 

ഏകാന്തത

ഏകാന്തത ഒരു തണലാണ്
മഴയത്ത് ചൂടുന്ന കുടപോലെ
തന്നിലേക്കുതന്നെ വലിയാനുള്ള തണൽ 

അകൽച്ച

ഒരു പുതപ്പിൽനിന്നുള്ള അകൽച്ച
രണ്ടു മുറിക്കുള്ളിലാക്കി
പിന്നതു രണ്ടു മതിൽക്കെട്ടിലാക്കി
                     "അകൽച്ച"
വളർന്നുകൊണ്ടേയിരുന്നു. 

ഡിവോഴ്സ്

ആ ത്രീയേക കുടുംബം
പിരിയാൻ  വിധിയായി
കടലാസു കൈപ്പറ്റി മടക്കിപിടിച്ച്
അവൻ അവളോട്  ചോദിച്ചു
ഈ കുഞ്ഞിനുവേണ്ടി
നമുക്ക് ഒന്നിച്ചു കൂടെ...  

ആത്മഹത്യ

ആരൊക്കെയോ കൂടെയുണ്ടെന്ന തോന്നലിനെ
തനിക്കാരുമില്ല എന്ന തോന്നൽ മറികടക്കുമ്പോൾ
ചിലപ്പോൾ സംഭവിക്കുന്നതാവാം ആത്മഹത്യ   

ഒരു പള്ളി കഥ

അൾത്താരയിൽനിന്ന് ആ പുതുവൈദികൻ
അവിടെ ആരോ നടത്തിയ ഒരന്യായത്തെക്കുറിച്ച്
പറഞ്ഞു പറഞ്ഞു തുടങ്ങി പിന്നെ കത്തികയറി
ഇതൊരു കുഞ്ഞാടിന്റെ നെഞ്ചിൽ
കൂരമ്പായി തറച്ചു കുഞ്ഞാടുടനെ
വൈദികനു മുകളിലെ ദൈവവുമായി
ബന്ധപ്പെട്ടു ഒരു സ്ഥലംമാറ്റം തരപ്പെടുത്തി
                              പിറ്റേന്ന്
നന്മ പറഞ്ഞതിലെ തെറ്റിനെകുറിച്ചോർത്ത്
അവസാന ബലിയിൽ   അവനുവേണ്ടിയും
പ്രാർത്ഥിച്ച് നെടുവീർപ്പോടെയാ വൈദികൻ
ബലിപീഠം ചുംബിച്ചു പടിയിറങ്ങി.......