കള്ളുകുടി നിർത്തൽ

കള്ളുകുടി നിർത്താൻ   

എളുപ്പമാണ് 

തുടങ്ങാനും. 

കടം

ജീവിതം 

തന്നവർക്ക്

എന്തു കൊടുത്താണ്

കടം വീട്ടുക.

തീരം

കടലിന്റെ തീരം

കരയാണ്

വാക്കിന്റെ തീരമോ

കവിതയും.

ചെരുപ്പ്

കാലുമാറുന്നതിനാലാവാം

ചെരുപ്പിനൊക്കെ

ഒരേ സൈസ് 

വിവാദം

വിവാദം

നിങ്ങളെ

നായകനാക്കും..

കടം

പ്രണയം കടം കൊടുത്തവൾ

ഇന്നലെയും വിളിച്ചു

            മകന്റെ

അഡ്മിഷനുവേണ്ടി

അവൾ ഇങ്ങനെ ഇടയ്ക്കിടയ്ക്ക്

വിളിക്കും

കടം ഞാൻ മറന്നോ എന്നറിയാൻ.

ദേശാടനം

മക്കൾ നഗരത്തിൽ

ഉദ്യോഗസ്ഥ പ്രമുഖരായി

വഴിയേ

അച്ഛൻ ഫ്ലാറ്റിലെ

കാവൽക്കാരനായി

അമ്മയുള്ളതിനാൽ 

വേലക്കാരിയെ

ഒഴിവാക്കി

ഒരു വൃദ്ധദിനത്തിൽ

ആരെയുമറിയിക്കാതെ

അവർ

ദേശാടനത്തിനിറങ്ങി.

മരണക്കിണർ

മകൻ വണ്ടി ഓടിക്കുമ്പോൾ 

അമ്മയുടെ നെഞ്ചിലാണ്

മരണക്കിണർ.

കിളിയുടെ ആകാശം

 കിളിയുടെ ആകാശം

മനസ്സുപോലെ

ഇഷ്ടത്തിനനുസരിച്ച്

നിറം മാറും,

ചിലപ്പോൾ ചൂടാകും,

 ഉച്ചത്തിൽവഴക്കിടും

ചിലപ്പോൾ തോരാതെ

              കരയും.

കൊല

പത്തൊൻപതിൽ 

തൂങ്ങി ചാകാതിരിക്കാൻ 

പാമ്പുകടിച്ചവൾ

മരിക്കാതിരിക്കാൻ

പണം തൂക്കി അവളെ 

കൊല്ലാതിരിക്കാൻ 

ആ അമ്മ അവളുടെ

കഴുത്ത് ഞെരിച്ചു

കൊന്നു.

കവിയോടൊപ്പം

അക്ഷരങ്ങൾക്കൊണ്ട്

മായാജാലം കാട്ടുന്ന

കവി

എന്നുമൊരു

സ്വപ്നമായിരുന്നു.

ഒരിക്കൽ കവിയോടൊപ്പം

കുറച്ചു നിമിഷങ്ങൾ

അന്ന് 

അദ്ദേഹം സ്വപ്നത്തിന്റ

രൂപക്കൂടുകൾ പൊളിച്ചിറങ്ങി

എന്നെ

ചേർത്തുപിടിച്ചു.

കോടതി

ആ കുഞ്ഞുങ്ങൾക്ക്

കോടതി 

എന്നും മറക്കാത്ത

ഓർമ്മയാണ്

അവിടെവെച്ചാണ് 

അമ്മ അച്ഛനെ വേണ്ടെന്നും

അച്ഛൻ അമ്മയെ വേണ്ടെന്നും പറഞ്ഞത്.

ജീവന്റെ ഗീതം

ജീവന്റെ ഗീതം

പാടേണ്ടവരുടെ

കഴുത്തുഞെരിച്ചിട്ട്

ജീവനായ് കേഴുന്നു.

ചായ

തൂവെള്ള പാലിൽ

പൊടിയിട്ടാൽ

നിറം മാറും

മണം മാറും

ചായ ആകും

തുവെള്ള മനസ്സിൽ

ശത്രുതയിട്ടാൽ

പക ഉണരും

വൈരം നിറയും

മൃഗം ആകും.

ഉയരെ

ഉയരെ പറക്കാൻ

കൊതിച്ച അവളുടെ

ചിറകുകൾ അറുത്തിട്ട്

അവർ പറഞ്ഞു

അവൾ പറക്കട്ടെ

രസം

ഒരു രസത്തിന് തുടങ്ങിയ ശീലങ്ങൾ

ഒരുപാട് രസമായിപ്പോയി

ദുശീലങ്ങളായി

ഇന്നും കൂടെയുണ്ട്.

ആയുധം

അവന്റെ നെഞ്ചിൽ

ആയുധം ഇറക്കി ഞാൻ

നേതാവായി

നാളെയീ സ്ഥാനത്തിനായ്

എന്റെ നെഞ്ചിലും ഇറക്കും.

പെങ്ങൾ

എന്നെഴുതാൻ പോലും

പേടിയാണ്  കാരണം

അവളുടെ കൂടെ 

 എത്ര കൊടുത്താൽ

അവൾക്കൊരു നല്ല

ജീവിതം കിട്ടും എന്നോർത്ത്

സ്വപ്നം, ദുഃസ്വപ്നം

ഭാര്യ ഇന്നൊരു സ്വപ്നം

കണ്ടു ജോലിക്കായി

വിദൂരത്ത് പോയ ഞാൻ

ഒരു പെട്ടിയിൽ മടങ്ങി

വരുന്നു.

ഉറക്കത്തിന്റെ ആലസ്യത്തിൽനിന്നും

കണ്ണും തിരുമ്മി എണീറ്റപ്പോ

അരികത്ത് ഞാൻ

പിന്നെ ഒരൊറ്റ

കരച്ചിലായിരുന്നു.

യാത്രയിൽ നാം

(അകാലത്തിൽ പിരിഞ്ഞ

കൂട്ടുകാരന് വേണ്ടി)

യാത്രയിലാണ് നാം

ജീവിതയാത്രയിൽ

ഏതോ ഒരു ബിന്ദുവിൽ

നമ്മൾ ഒത്തുചേർന്നു

യാത്രപറയാതെ

നീ എങ്ങോ അകന്നു

നീ പകുത്ത സന്തോഷം

അനിർവചനീയം

വീണ്ടും നിന്നെ കാണാനായ്

ഈ യാത്ര തുടരുന്നു.

തണലില്ലാത്ത മരം

ആ മരം വെട്ടാൻ കടയ്ക്കൽ

കത്തി വെച്ചപ്പോളാണ്

കിളികുഞ്ഞുങ്ങളുടെ

കളകളാരവം കേട്ടത്.

വായന

 വഴിയിൽ കിടന്ന

കടലാസ് വായിച്ചപ്പോളാണ്

അക്ഷരങ്ങൾകൂട്ടി

വായന പഠിപ്പിച്ച സാറിനെ ഓർത്തത്.

കുട

മഴയുടെ

വിലയറിയണമെങ്കിൽ

കുട വേണം.

ഓൺലൈൻ ക്ലാസ്സ്

കുട്ടികൾ നന്നായ് അണിഞ്ഞൊരുങ്ങി

പുസ്തകം എല്ലാം

എടുത്തൊരുങ്ങി

 പേനയും പെൻസിലും ബോക്സിലാക്കി

ഫോണിലോ ജിബികൾ

ചാർജ്ജിലാക്കി

ടീവിയിലെ ചാനൽ

കണ്ടുനോക്കി

ഓൺലൈൻ ക്ലാസ്സിനായി

കാത്തുനിന്നു.

കൂട്

കൂട്ടുകൂടാൻ പണിതുനാം

കൂട്ടുചേരാൻ പണിതുനാം

കൂട് തീർന്ന നേരത്ത്

കൂട് വിട്ടകന്നു നീ.

ആർത്തു പെയ്യുന്ന മഴ

പെട്ടന്ന് കടലിലെത്താനുള്ള

തൃഷ്ണയാണ്

ആർത്തു പെയ്യുന്ന മഴ.

സിനിമ

തലവര മാറ്റിയിരുന്ന

വെള്ളിയാഴ്ചകൾ

ഇന്ന്‌

ദുഖവെള്ളിക്ക് സമം

തൊട്ടിൽ

തൊട്ടിൽ ഒരു

കുഞ്ഞായി

മാറുന്നു.

അവൻ അവളോട്

ഇഷ്ടത്തിന്റെ,

പ്രണയത്തിന്റെ,

സ്നേഹത്തിന്റെ,

പാരമ്യത്തിൽ

ദിനരാത്രങ്ങൾ

പറന്നകന്നു.

കാട്

കാടിനെ കൊന്നപ്പോൾ

ഓർത്തില്ല

ശ്വാസത്തിനുവേണ്ടി

പിടയേണ്ടിവരുമെന്ന്.

ഉത്തരക്കടലാസിലെ ഞാൻ

 അവൾ നിരത്തിയ

 ചോദ്യങ്ങളിൽ

എണ്ണി എണ്ണി കാണിച്ച

കുറവുകളിൽ

കൂട്ടിക്കിഴിച്ച്

അവസാനം

ശൂന്യമായിവന്നപ്പോൾ

ഒരു വാക്കും ഉരിയാടാനാവാതെ

ഉത്തരക്കടലാസിലെ ഞാൻ

വലിയൊരു തെറ്റായി മാറി.

അക്ഷരം

അറിവിന്റെ

ആദ്യാക്ഷരം

'അമ്മ'യാണ്.

പൂക്കാലം

ഒരു വസന്തത്തിന്റെ ഫോട്ടോഷൂട്ട്

സൂര്യൻ

സൂര്യൻ അസ്‌തമിച്ചപ്പോഴാണ് 

നാം ജയിച്ചത്.

വിത്ത്

മരത്തെ ഗർഭംധരിച്ചവൾ

മഴയിൽ ഞാൻ

കനലായ് എരിഞ്ഞ എന്നിലേയ്ക്ക്

മഴ

സ്നേഹവും

സാന്ത്വനവുമായി.

ഗുരു

അറിവിന്റെ ഭണ്ഡാരം

കഴിവിന്റെ കേദാരം

അനുഭവ സമ്പന്നൻ

ഗുരു തന്നെ ദൈവം.

ലഹരി

നുരഞ്ഞു പൊന്തിയ ഗ്ലാസിലും

പടർന്നിറങ്ങിയ പുകയിലും

ഒളിച്ചിരുന്നൊരു മരണമേ

നിന്റെ പേരോ ലഹരി.

പ്രണയം

പ്രണയം മനുഷ്യനെ

ഉന്മത്തനാക്കുന്ന ലഹരി

ഇതൾ

കരുതിവെച്ച

സ്വപ്നമെല്ലാം

പൊലിഞ്ഞു

ആ ചെടിയെ

പിരിഞ്ഞപ്പോൾ.

ഒന്നാം ക്ലാസ്സ്‌

വിഷയത്തിന്റെ ആഴമല്ല

വിഷമത്തിന്റെ ആഴമാണ്

ഒന്നാംക്ലാസ്സ്.

സ്ത്രീ

നീ തീയാവണം

തീ കനലാവണം

എല്ലാവർക്കുമായ്

എരിയുമ്പോളും

തൊട്ടാൽ പൊള്ളണം

അവൾ

കരളുമായി

ഒളിച്ചോടിയവൾ

ഒറ്റുകാർ

ഒറ്റുകാരെല്ലാവരും

ഒരുപോലായിരുന്നു

ഒന്നിച്ചു ചേർന്നവരെന്നെ

ഒറ്റയ്ക്കാക്കി.

തനിയെ

ഒത്തിരിയിൽ നിന്ന്

ഒന്നിലേയ്ക്ക്

ഒതുങ്ങുന്നു.

താരാട്ട്

അമ്മയുടെ മണമുള്ള പാട്ട്

ഇലകൾ പൂക്കളോട്

പെയ്തൊഴിഞ്ഞ മഴയിൽ

കാറ്റ് ഇലകളോട് എന്തോ മന്ത്രിച്ചു

അതാവാം ഇലകൾ

പൂക്കളോട് പറഞ്ഞത്

തീ

 ഒരു തീ 

നിന്നിൽ

ജ്വലിക്കണം

ആളിയങ്ങ് പടരണം.

പിറന്നാൾ

ഒരു നൊമ്പരത്തിന്റെ

ബാക്കിപത്രം.

വാക്ക്

വാക്കുകൾകൊണ്ട്

മുറിവേൽക്കും

അതേ നാവിലെ 

വാക്കുകൾ മുറിവ്

വെച്ചുകെട്ടും.

വിജയം

തോൽവികൾക്കിടയിൽ

ഒളിഞ്ഞിരിക്കുന്ന മാണിക്യം.

ചുവപ്പ്

ചുവപ്പ്

ഒരു 

നിറംമാത്രമല്ല,

സിരകളെ ത്രസിപ്പിക്കും

ലഹരി..

മരണം

പങ്കിട്ട 

ജീവന്റെ 

ആകെ 

തുകയാണോ മരണം.

കടൽ

കണ്ണീരൊഴുകി കടലുണ്ടായി 

ചിരിയോ തിരയായ് മാറി

മനുഷ്യന്

സങ്കടവും  സന്തോഷവും വന്നാൽ

അവൻ ഇന്നും 

കടല് 

കാണാൻ പോകും

ആ കടൽ അവരെ കാറ്റയച്ച് പുൽകും 

അവരൊന്നായ് അലിയും

മണ്ണ്

മണ്ണ് 

വാരി തിന്നും

മണ്ണിനായ് 

കൊമ്പ് കോർക്കും

മണ്ണ് 

അളന്ന് തിരിക്കും

ഒടുക്കം 

മണ്ണിൽ അലിയും..

യുവത്വം

ജാതിയോ

മതമോ

ഒന്നും നോക്കാതെ

വിളിപ്പുറത്തുള്ളവർ

പോരാളികൾ.

അതിമോഹം

അടുക്കളയിൽനിന്ന് 

അരങ്ങത്തേക്ക് 

ഒരുലോകം

സ്വപ്നംകണ്ട പെണ്ണിനോട്

അവർ 

പറഞ്ഞത്.

നിഴൽ

കൂടെയുള്ളവൾ 

തണലാണവൾ

ശരിയാണവൾ

പ്രണയിനിയവൾ

അതെ

എന്റെ നിഴലാണവൾ

" നീ "

കരിഞ്ഞുണങ്ങി തുടങ്ങിയ പൂങ്കാവനത്തിലേക്ക് നിന്റെ വരവ് ഒരു മഴപോലെയായിരുന്നു.

ഭൂമിമുഴുവൻ നനവിറങ്ങും എന്നു കരുതി കൊതിച്ചപ്പോൾ കുറുക്കന്റെ കല്യാണം പോലെ മഴയും വെയിലുമായി നീ എങ്ങോ മറഞ്ഞു.

കണ്ണീർപ്പാടം

കർഷകവർഗ്ഗത്തെ

കാൽകീഴിലാക്കുവാൻ

കണ്ണീർപ്പാടത്ത്

വിത്തിറക്കി.

കവിത

ഞാൻ കവിയും

നീ രചനയും

നീയാണെൻ കവിത