സ്നേഹം

എന്നെ എന്തിനിത്ര

 ഭ്രാന്തനായി നീ

പ്രണയിക്കുന്നു

എന്ന ചോദ്യത്തിന്റെ

ഉത്തരമാണ് രസം

"ആ മുഖത്തെ ചിരി കാണാൻ"

പൊസ്സസ്സീവ്നെസ്സ്

നിന്നിൽ ഞാൻ നടപ്പാക്കിയ

നിയന്ത്രണങ്ങൾ സ്നേഹത്തിന്റെ

നൂലിലായിരുന്നു കൊരുത്തത്

അത് നീ കണ്ടില്ല.

പക

എരിഞ്ഞടങ്ങാൻ

തുടങ്ങിയ ജീവിതം

 തിരിച്ചുപിടിച്ചത്

അവനോടുള്ള

പക കാരണമാണ്

അവന്റെ മുന്നിൽ

വിജയിച്ചു കാണിക്കണം

എന്ന ആഗ്രഹത്തിൽ നിന്നാവാം

ഈ പക വന്നത്.

ജീവിതം

 ആരും കൂടെയില്ല

ആരും കൂടെയുണ്ടാവില്ല

ഈ തിരിച്ചറിവിൽനിന്നാണ്

ഒരാൾ ജീവിക്കാൻ തുടങ്ങുന്നത്.

143

 നീ തന്നത് മഞ്ചാടി

ഞാൻ തന്നത് നെഞ്ചാടീ.

                 /

നീ തന്നത് മഞ്ചാടി

എന്റെ നെഞ്ചാടീ

ഒഴിഞ്ഞ പാത്രത്തിന് പറയാനുള്ളത്

ഒഴിഞ്ഞ പാത്രമായതോടെയാണ്

ഞാൻ

പലതും

തിരിച്ചറിഞ്ഞത്.

ഡയറി

എനിക്ക് നീ ആരാണെന്ന്

നിനക്കറിയണോങ്കിൽ

ആ ഡയറി തുറക്ക്

വേറെ ഒരാളെ നിനക്കവിടെ

കാണാനാവില്ല.

ജയ ഹേ

4 മണിയുടെ

സ്വാതന്ത്ര്യത്തിലേക്കുള്ള

വിസിൽ

ദാരിദ്രരേഖ

വിശന്ന് കരഞ്ഞ

നമുക്കിടയിലൂടെ

കടന്നുപോയ

പാമ്പ്.

അതിർത്തിയിൽ വിരിഞ്ഞ പൂവ്

വെടിയുണ്ടകൾ തകർത്ത

ജീവിതങ്ങളുടെ ഓർമ്മയ്ക്കായ്

തനിയെ വളർന്ന പൂവ്

ഈയൽ

വെളിച്ചം തേടി പോയി

ജീവിതം ഇരുട്ടിലായി.

ആശുപത്രി- ഒരോർമ്മ

ഒരുമിച്ചു തുടങ്ങിയ യാത്ര

ഒരാശുപത്രിയിൽ അവസാനിച്ചപ്പോൾ

ഒരാൾ എന്നെന്നേക്കുമായി

ഒറ്റയ്ക്കായി.

വിജനത

അവൾ പടിയിറങ്ങി

വിജനത പടികയറി

അറ്റുപോയത്

അറ്റുപ്പോയ മനസ്സുകൾ

തുന്നിച്ചേർക്കാൻ

കഴിയാത്ത ആശുപത്രികളാണ്

നമ്മൾ.

പ്രതീക്ഷ

നീ എന്റെകൂടെയുണ്ട്

എന്നതാണ് ഏറ്റവും

വലിയ പ്രതീക്ഷ.

വിട

ഇനിയും അവശേഷിക്കുന്നു

ഒരു ക്ലാസ്സുകൂടി 

പക്ഷേ...

വിട പറയാൻ വെമ്പലായി.

താക്കോൽ

ഓരോ പ്രഭാതത്തിന്റെയും താക്കോൽ

                നിന്റെ ചിരിയാണ്.

വിട

പെയ്തൊഴിഞ്ഞ മഴ

ഭൂമിയോട് മന്ത്രിച്ചത്.

അലർച്ച

എനിക്കുമാത്രമറിയാവുന്ന 

വേദനയുടെ കൂമ്പാരത്തിൽ നിന്നാണ്

ഞാൻ അലറിയത്.

പക്ഷേ അത് കണ്ടുനിന്നവർ

എന്നെയൊരു ഭ്രാന്തനായി മുദ്രകുത്തി.

മനസ്സ്

ജീവിതം പകുത്ത

പാതിക്ക്പോലും

കൊടുക്കാതെ

കാത്തു വെച്ചത്.

നാവ്

32 പല്ലിന്റെ

അകമ്പടിയും

തണലും കൊണ്ടാവും 

നാവ് തന്റേടിയായി

ഇന്നും ഒറ്റയ്ക്ക്

നിൽക്കുന്നത്.

പ്രാർത്ഥന

ഞാനും

നീയും

ഒരു നൂലിലെ

മുത്തുകളാവുമ്പോൾ

സംഭവിക്കുന്നത്..

ചർച്ച

 ചർച്ചചെയ്യാനൊരുങ്ങിയ കാര്യങ്ങൾ

അംഗങ്ങൾക്കെതിരെ വരുമെന്നതിനാൽ

'ചർച്ച' പേപ്പറിൽ ഒതുക്കി.

സിഗ്നൽ

നിറഞ്ഞൊഴുകിയ നയനങ്ങൾക്ക് 

പകലിന്റെയും ഇരുളിന്റെയും

നിറങ്ങളുണ്ടായിരുന്നു.

ചുഴികൾ

ഇണയാക്കിയും

തുണയാക്കിയും

പ്രണയവഴിയിൽ

ചുഴികൾ സുലഭം.

കാത്തിരിപ്പിന്റെ ഫലം

നിനക്കായ്‌ കാത്തിരുന്ന

രാവുകളെക്കാൾ കഠിനം

നിന്റെ മൗനമാണ്.

ദൂരം

നമ്മുടെ സ്നേഹത്തിന്റെ ആഴമെത്രയെന്നു

ചോദിച്ചവരോട് ഞാൻ പറഞ്ഞു

ഒരു കിനാവിന്റെ ദൂരമാണെന്ന്.

സുന്ദരി

കാർമുകിൽ പുണർന്ന നയനങ്ങളും

കാർവർണ്ണൻ നിറമാർന്ന കർകൂന്തലും

മാൻപേടയെപോലുള്ള ഇമവെട്ടലും

നെറ്റിയെ പകുക്കുന്ന സിന്ദൂരവും

ഒന്നിച്ചിണക്കുന്ന സംസാരവും

മൊഞ്ചുള്ള നീ എന്റെ നെഞ്ചിലാണ്

ഉള്ളിന്റെ ഉള്ളിൽ കുടിയിരിപ്പൂ.

നീ

 നടന്നകന്ന വഴികളിൽ 

നീ

അവശേഷിപ്പിച്ച കാൽപാടുകൾ

 എനിക്ക് വഴിയായ് തെളിയും.