കടം

ജീവിതം 

തന്നവർക്ക്

എന്തു കൊടുത്താണ്

കടം വീട്ടുക.

തീരം

കടലിന്റെ തീരം

കരയാണ്

വാക്കിന്റെ തീരമോ

കവിതയും.

ചെരുപ്പ്

കാലുമാറുന്നതിനാലാവാം

ചെരുപ്പിനൊക്കെ

ഒരേ സൈസ് 

വിവാദം

വിവാദം

നിങ്ങളെ

നായകനാക്കും..

കടം

പ്രണയം കടം കൊടുത്തവൾ

ഇന്നലെയും വിളിച്ചു

            മകന്റെ

അഡ്മിഷനുവേണ്ടി

അവൾ ഇങ്ങനെ ഇടയ്ക്കിടയ്ക്ക്

വിളിക്കും

കടം ഞാൻ മറന്നോ എന്നറിയാൻ.

ദേശാടനം

മക്കൾ നഗരത്തിൽ

ഉദ്യോഗസ്ഥ പ്രമുഖരായി

വഴിയേ

അച്ഛൻ ഫ്ലാറ്റിലെ

കാവൽക്കാരനായി

അമ്മയുള്ളതിനാൽ 

വേലക്കാരിയെ

ഒഴിവാക്കി

ഒരു വൃദ്ധദിനത്തിൽ

ആരെയുമറിയിക്കാതെ

അവർ

ദേശാടനത്തിനിറങ്ങി.

മരണക്കിണർ

മകൻ വണ്ടി ഓടിക്കുമ്പോൾ 

അമ്മയുടെ നെഞ്ചിലാണ്

മരണക്കിണർ.

കിളിയുടെ ആകാശം

 കിളിയുടെ ആകാശം

മനസ്സുപോലെ

ഇഷ്ടത്തിനനുസരിച്ച്

നിറം മാറും,

ചിലപ്പോൾ ചൂടാകും,

 ഉച്ചത്തിൽവഴക്കിടും

ചിലപ്പോൾ തോരാതെ

              കരയും.

കൊല

പത്തൊൻപതിൽ 

തൂങ്ങി ചാകാതിരിക്കാൻ 

പാമ്പുകടിച്ചവൾ

മരിക്കാതിരിക്കാൻ

പണം തൂക്കി അവളെ 

കൊല്ലാതിരിക്കാൻ 

ആ അമ്മ അവളുടെ

കഴുത്ത് ഞെരിച്ചു

കൊന്നു.